Në punë me automjet? Leje online përmes e-Albania

Njihuni me udhëzimet për aplikim të saktë!

Nga data 16 prill, autorizimi për përdorimin e makinës ose motoçikletës për të shkuar dhe për t’u kthyer nga puna mund të merret online përmes platformës e-Albania. Kryeministri Edi Rama njoftoi nëpërmjet një videoposti në rrjetet sociale, se qytetarët do të lejohen të shkojnë në punë me automjet vetëm duke marrë leje në e-Albania, thjeshtë dhe shpejt me vetëm një klik, shërbim që do të lehtësojë lëvizjen e tyre në vijim. “Leje për punë”, që vlen brenda fashës orare zyrtare 05.00-08.00 dhe 16.00-17.30 ose në orare të caktuara duke zgjedhur opsionin “Punë me turne”. “Leja për punë” me automjet jepet vetëm për ata që punojnë në sektorin privat edhe në këto ditë të vështira, si edhe për nëpunësit e administratës publike. Ndërsa në automjet, nuk lejohet të lëvizin më shumë se dy persona: Drejtuesi i mjetit, I punësuar në një nga dy sektorët e sipërpërmendur, një familjar i tij me autorizim pune ose një koleg në të njëjtin vend pune. Me kushtin që, për arsye sigurie, shoqëruesi të ulet në sediljen e pasme, diagonal me drejtuesin e mjetit. Ata, që nuk respektojnë fashën orare zyrtare apo oraret specifike të përzgjedhura nga ata vetë, apo që nuk kanë një autorizim për lëvizje me automjet nga e-Albania do të ndëshkohen në përputhje me ndryshimet e miratuara në Kodin Penal, në Kuvendin e Shqipërisë.

Aplikimi në e-Albania për “Leje për punë” me automjet

Identifikohuni në e-Albania përmes llogarisë tuaj personale dhe klikoni në shërbimin elektronik “Leje për dalje”. (https://e-albania.al/eAlbaniaServices/UseService.aspx?service_code=13659)

Zgjidhni opsionin “Leje për mjet për punë” dhe nëse mjeti është në pronësinë tuaj ai do t’ju shfaqet automatikisht në listë dhe ju mjafton të klikoni butonin “Dërgo”.

Nëse mjeti nuk është në pronësinë tuaj, mjafton të vendosni targën e mjetit dhe numrin e shasisë së tij.

Kujdes! Një person mund të aplikojë për leje qarkullimi vetëm për një automjet.

Miratimi i lejes nga Policia e Shtetit do t’ju mbërrijë në adresën e e-mail-it ose në numrin e telefonit, që keni përdorur për t’u regjistruar në platformën e-Albania.

Po nëse zgjedh opsionin “Punë me turne”?

Opsioni “Punë me turne” është krijuar për të lehtësuar lëvizjen e qytetarëve, të cilët shkojnë në punë në orare të ndryshme, jashtë fashës orare zyrtare: 05.00-08.00 dhe 16.00-17.30, pra ata të cilët punojnë edhe pasditeve si edhe në fundjavë. Për rrjedhojë, ata të cilët punojnë me turne, duhet patjetër të zgjedhin oraret specifike të lëvizjes, nga e hëna në të diel. Për ata, që aplikojnë për leje përmes opsionit: “Punë me turne”, përgjigja miratuese nga e-Albania vjen në moment dhe është e vlefshme gjatë gjitës javës, përfshirë fundjavën.

*Kërkesa për “Leje për punë” me automjet bëhet jo vetëm në e-Albania, por edhe mesazh të thjeshtë në numrin: 55155

Formatet e SMS-ve janë 4, sipas specifikës së aplikuesit:

*Për shtetas shqiptarë, që kërkojnë të qarkullojnë me mjet me targë shqiptare:
M targa, shasia NID

*Për shtetas të huaj, me mjet me targë të huaj:
MF F targa NID;

*Për shtetas shqiptar, me mjet me targë të huaj:
MF targa NID

*Për shtetas të huaj, me mjet me targë shqiptare:
M F targa shasia NID.

Kujdes:

*Respektoni hapësirat si në formatin e mësipërm.

*Gërmat M dhe F janë të pandryshueshme

*Targa, shasia dhe numri i identitetit (NID) janë unike, si për qytetarin, autoveturën dhe motoçikletën.